Southampton rəhbərliyində Rasmus Ankersenin istefası

Sport Republic-in icraçı direktoru Rasmus Ankersen artıq Southampton idarə heyətində olmayacaq. 42 yaşlı futbol meneceri klubdakı direktor vəzifəsindən istefa verib, amma Çempionşip təmsilçisinin həmtəsisçisi kimi pay sahibi qalır.

Bu, uzun müddətdir arxa planda gedən prosesin rəsmi təsdiqi kimidir. Ankersen son illərdə Saints strukturunda əvvəlki qədər görünmürdü. Səbəb aydındır: o, Türkiyə təmsilçisi Goztepenin prezidenti kimi paralel böyük layihəyə rəhbərlik edir. Buna baxmayaraq, o, indiyə qədər Southamptonın transfer və kadr siyasətində müəyyən rol oynamaqda davam edirdi.

Ankersenin adı xüsusilə analitik yanaşma və model əsaslı klub idarəçiliyi ilə assosiasiya olunur. O, 2015–2021-ci illər arasında Brentfordda çalışdığı dövrdə klubun tarixində dönüş nöqtəsinə şahidlik etmişdi. Həmin illərdə London təmsilçisi uzunmüddətli planlaşdırma və ağıllı transfer strategiyası ilə Premier Leagueə yüksəldi və bu layihənin mərkəzində məhz Ankersen dayanırdı.

İndi isə o, Southamptonda ön səhnədən bir addım geri çəkilir. Amma Sport Republic daxilində güc balansı tam dəyişmir. Şirkətin sahibi, serbiyalı iş adamı Dragan Solak Saintsdə nəzarət paketini əlində saxlayır və klubun əsas qərarverici fiquru olaraq qalır.

Sport Republic-in futbol xəritəsi təkcə Southamptonla məhdudlaşmır. Qrup həmçinin Fransada Valenciennes klubunda, eləcə də Ankersenin prezidenti olduğu Goztepedə nəzarət payına malikdir. Türkiyə təmsilçisi hazırda Super Liqanın son pilləsində qərarlaşıb və ciddi təzyiq altında mübarizə aparır. Bu fon Ankersenin diqqətinin böyük hissəsini İzmir klubuna yönəltməsini daha da izah edir.

Beləliklə, Southampton idarə heyətində bir kreslo boşalır, amma şəbəkənin özəyi – Sport Republic modeli – yerindədir. İndi sual budur: Ankersenin rəsmi çəkilişi ilə Saintsin transfer siyasəti və uzunmüddətli planı necə dəyişəcək?