St. Pauli: Yenidən Bundesliqa Yolunda Mübarizə

2024/25 mövsümündə möcüzə kimi qalan bir hekayə vardı: uzun illərdən sonra ilk dəfə elitada qalan, Millerntor tribunalarını ayağa qaldıran St. Pauli. Ardınca gələn 2025/26 isə sərt reallıq oldu – cəmi 6 qələbə, 8 heç-heçə, 20 məğlubiyyət və cədvəlin dibindən 2. Bundesliga’ya geri dönüş.

Bir mövsüm əvvəl bayram edən Hamburg məhəllələri indi yenidən bərpa planı qurur.

Dağılmış skelet: gedənlər

Yenidənqurma, təbii ki, itkilərlə başladı. Klub təkcə liqanı yox, həm də soyunma otağının onurğa sütununu itirdi.

Ən böyük zərbə kapitan Jackson Irvine-in gedişi oldu. 153 oyun, 15 qol, 21 məhsuldar ötürmə – rəqəmlərdən çox, o, St. Pauli üçün xarakter idi. Komandanı 2023/24-də Bundesliqaya daşıyan lider, tribunalarla xüsusi bağ quran sima. Elə bir futbolçu ki, adı Millerntor ətrafında artıq məhəllə mifologiyasına çevrilmişdi.

Onun Cerezo Osaka-ya keçmək üçün transfer istəməsi çoxlarını hazırlıqsız yaxaladı. Üstəlik, mövsümün ilk oyunu başlamasına bir həftədən də az qalmış. Tribunalar üçün bu, həm emosional, həm də idman baxımından ağır zərbə idi.

Zərbələr bununla bitmədi.

• Qapıda illərin etibarlı adı Nikola Vasilj Al-Diriyah-a azad agent kimi getdi – 167 oyun, 43 “quru” matç.
• Müdafiənin dayaq nöqtələrindən Karol Mets Bochum-a, yenə pulsuz. 91 oyunluq təcrübə bir anda silindi.
• Sağ cinahın enerjisi Manolis Saliakas Olympiacos-a 1,3 milyon avroya yollandı. 120 oyunda qazandığı vərdişlər artıq Pirey üçün işləyəcək.
• Mərkəzdə hava toplarının hakimi Hauke Wahl Wolfsburg-a 2 milyon avroya keçdi. 105 oyunun sabitliyi arxada qaldı.
• Hücum xəttinin elastik fiqurlarından Daniel Sinani isə Sampdoria-ya azad agent kimi qoşuldu (70 oyun).

Bunlara bir də baş məşqçi Alexander Blessin-in vəzifədən uzaqlaşdırılmasını əlavə edin. Mövsüm bitəndən qısa müddət sonra klub yeni istiqamət seçdi. Köhnə layihə bağlandı.

Yeni simalar, yeni ideya: Rapp dövrü başlayır

Bütün bu itkilərin fonunda klub təkcə heyəti deyil, kimliyini də yenidən formalaşdırmağa çalışır.

Ən diqqətçəkən gəliş hücum xəttindədir. Branimir Hrgota – Fürth tarixində Bundesliqanın ilk iki pilləsində ən məhsuldar futbolçu. 238 oyunda 69 qol, 41 assist. Bu rəqəmlər təkcə məhsuldarlıq deyil, davamlılıq göstəricisidir.

2020/21 mövsümündə Fürth-i tarixində cəmi ikinci dəfə Bundesliqaya daşıyan futbolçu idi – 16 qol, 7 assistlə. İndi isə St. Pauli-nin ön xəttinə həm qollar, həm də soyunma otağı üçün səs gətirməlidir. Və bütün bunlar – azad transferlə.

Arxa xəttə isə Magdeburg-dan Marcus Mathisen əlavə olundu. Təcrübəli mərkəz müdafiəçisi, heyətdə yaranan boşluqları nəzərə alanda, sadəcə “əlavə” yox, məcburi sütun təsiri bağışlayır.

Ən böyük struktur dəyişikliyi isə ehtimal ki, kənardan ən az görünən, amma meydanda hər şeyi dəyişən yerdədir: texniki zonada.

47 yaşlı Marcel Rapp Holstein Kiel-dən gətirildi. O, 2023/24-də Kiel-i tarixində ilk dəfə Bundesliqaya çıxarmışdı – və maraqlısı odur ki, həmin mövsümdə St. Pauli də çempion olub elitaya qayıtmışdı. İndi bu iki hekayə Hamburgda kəsişir. Rapp-ın sübut olunmuş yüksəliş modeli, St. Pauli-nin yenidən yuxarı atılmaq istəyinə tam uyğun gəlir.

Yay sınaqları: Rapp-ın St. Pauli-si nə vəd edir?

Yoxlama oyunları bəzən aldatsa da, bir şeyi göstərir: ideya. Rapp-ın ideyası isə artıq kontur qazanıb.

İlk rəqib şəhər qonşusu Altona 93 oldu. St. Pauli bu matçda 2:6 hesablı qələbə ilə həm güc fərqini, həm də hücum potensialını nümayiş etdirdi. Ardınca Regionalliga Nord təmsilçisi Kickers Emden üzərində 1:3 hesablı qələbə gəldi – daha çətin, daha “sıx” oyun, amma yenə də üstünlük Hamburg təmsilçisində.

Alman rəqiblərə qarşı son sınaq Babelsberg ilə idi – tribunalar səviyyəsində dostluq, meydanda isə işgüzar soyuqluq. Nəticə: 1:4 hesablı qələbə və Abdoulie Ceesay-dan ilk hissədə het-trik. Bu, hücum xəttinin tavanını göstərən siqnal idi.

Avropa sınaqları da gecikmədi. Xorvatiya klubu Gorica ilə matçda St. Pauli 1:2 hesabı ilə qalib gəldi, qolları Louis Oppie və Ricky-Jade Jones vurdu. Amma bu oyunun ən acı xəbəri nəticə yox, Ceesay-in zədəsi oldu – sağ topuqda kapsul-bağ zədəsi. Formaya yeni alışan hücumçu üçün bu, temp itgisi deməkdir.

Daha sonra səviyyə kəskin artdı. Avstriyada Premier League və Europa League təmsilçisi Bournemouth ilə duel. Kaars 22-ci dəqiqədə hesabı açdı, amma sonra 27 dəqiqəlik qara zolaq gəldi – ardıcıl 4 qol buraxıldı, 4:1. Bu, yay hazırlığının tək məğlubiyyəti idi, amma həm də xəbərdarlıq: bu komanda hələ balans axtarır.

Millerntor-da yeni mövsüm öncəsi ilk görüş isə LaLiga-ya yeni yüksəlmiş Deportivo de La Coruña ilə oldu. St. Pauli iki dəfə hesabda önə keçdi – əvvəlcə Taichi Hara, sonra Kaars fərqləndi. Lakin 84-cü dəqiqədə ispanların bərabərlik qolu gəldi. 2:2. Tribunalar üçün həm ümid, həm də narahatlıq doğuran ssenari: qol vurmaq problem deyil, amma üstünlüyü saxlamaq hələ ki, alınmır.

Rapp-ın lövhəsi: üçlü müdafiə və çevik hücum

Taktiki baxımdan böyük inqilab gözlənilmir, amma incə toxunuşlar oyunun obrazını dəyişə bilər. Rapp-ın üçlü müdafiədən imtina edəcəyi real görünmür.

Eric Smith-in durumunun mövsümöncəsi qeyri-müəyyənliyi onu start heyətindən kənarda qoya bilər. Bu halda arxa xəttin mərkəzində Tomoya Ando və ya Adam Dzwigala-nın başlaması ehtimalı artır. Yeni transfer Marcus Mathisen isə bu üçlüyün təbii mərkəzi namizədidir.

Mərkəz xəttində oyunun ritmini Fujita qurmalıdır. Onun yanında Rasmussen və ya Metcalfe-dən biri çıxış edə bilər. Cinahlarda Pyrka və Oppie-nin dinamikliyi Rapp-ın sistemində açar rol oynayacaq. Ehtiyatda Lars Ritzka və Erik Ahlstrand kimi etibarlı variantların olması rotasiya üçün nəfəsdir.

Hücum xəttində isə diqqətlər Hrgota-nın üzərində cəmlənəcək. O, ön üçlüyün ağıllı mərkəzi kimi Jones, Hara və Ceesay (sıralara qayıdanda) ilə cütləşə bilər. Kaars isə bu strukturun ən önündə, rəqib cərimə meydanında son toxunuşun əsas ünvanı kimi görünür.

Proqnozlaşdırılan sxem belə formalaşır: 3-4-2-1

Voll – Nemeth, Mathisen, Ando – Pyrka, Rasmussen, Fujita, Oppie – Hrgota, Jones – Kaars.

Bu, həm çevik, həm də rəqibə uyğunlaşa bilən quruluşdur. Amma bir şərtlə: yeni simalar tez uyğunlaşmalıdır.

Hədəf: yenidən Bundesliqa – amma bu dəfə nə qədər tez?

Tarix St. Pauli azarkeşlərinə səbrli olmağı öyrədib. 2010/11 mövsümündəki enişdən sonra klubun Bundesliqa’ya dönüşü 13 il çəkdi. Bu, təkcə statistik məlumat deyil, bu tribunalar üçün emosional xatirədir.

Klubun ən sürətli geri dönüşləri belə 4 il çəkib – 90-cı illər və 2000-lərin əvvəlində iki dəfə. Yəni St. Pauli üçün “dərhal geri qayıdış” anlayışı heç vaxt asan olmayıb.

Bu dəfə fərqli ola bilərmi?

Heyətdəki itkilərə baxmayaraq, nüvə qorunub. Yay hazırlığı göstərdi ki, bu komanda hələ də “öz çəkisindən yuxarı zərbə vurmağı” bacarır. Üstəlik, St. Pauli hazırda 2. Bundesliga-da ən yüksək dəyərə malik ikinci heyətə sahibdir – yalnız VfL Wolfsburg irəlidədir, aradakı fərq isə təxminən 200 milyon avro həcmində olsa belə.

Reallıq budur: Wolfsburg çempionluğun əsas favoritidir. Onların arxasında isə 2-ci və 3-cü yerlər uğrunda sıx mübarizə gözlənilir. Hannover, eləcə də Bundesliqa-dan birgə enən Heidenheim bu yarışın içində olacaq.

St. Pauli bu mübarizədə harada dayanacaq? Kağız üzərində – ilk altılıqdan aşağısı uğursuzluq sayılmalıdır. İlk üçlük isə real hədəf ola bilər, əgər Rapp-ın ideyaları tez oturuşsa, Hrgota liderliyə çəkilsə və zədələr komandanı yarı yolda qoymasa.

Millerntor artıq enişi gördü. İndi sual təkdir: bu dəfə qalxış nə qədər sürətli olacaq?