Tottenham Brentford qarşısında 0:3 məğlub oldu

Tottenham mövsümə arzuolunmaz ssenari ilə başladı. Gtech Community Stadium-da Brentford 3:0 hesablı qələbə ilə London klubunu meydandan sildi, Roberto De Zerbi-nin komandası isə hər xəttdə uduzdu.

Ev sahibləri oyuna elə ilk dəqiqələrdən dişini göstərdi. Sərt, aqressiv pressinq, itirilmiş hər topun dalınca qaçış, ikinci toplara sahib çıxmaq – Tottenham buna cavab tapa bilmədi. Cəmi 12-ci dəqiqə idi ki, hesab açıldı: sağ cinahdan Mamadou Sangare cərimə meydançasına endi, aşağı ötürmə etdi, Keane Lewis-Potter isə sürüşərək topu tora göndərdi. Qonaqlar üçün soyuq duş.

Təzyiq burada dayanmadı. Brentford hər hücumda Tottenham müdafiəsini daha da dərinliyə sıxırdı. 33-cü dəqiqədə isə ikinci zərbə gəldi. Jensenin zərbəsini qapıçı Antonin Kinsky geri qaytardı, amma düz Vitaly Janelt-in önünə. Alman yarımmüdafiəçi bu hədiyyəni rədd etmədi və fərqi iki topa yüksəltdi. Kinsky-nin epizoddakı qərarsızlığı artıq oyunun tonunu müəyyənləşdirirdi.

İlk hissə Tottenham üçün dağınıq, ritmsiz və bəlkə də xəbərdarlıq xarakterli görünə bilərdi. Ancaq xəbərdarlıqdan nəticə çıxmadılar.

İkinci hissə, eyni ssenari

Fasilədən sonra kimin üstün gələcəyi barədə heç bir sual qalmadı. Brentford yenə daha sürətli başladı, yenə daha aqressiv idi. Bu dəfə standart vəziyyət London klubunu yıxdı. Künc zərbəsindən sonra müdafiəçilər topu uzaqlaşdıra bilmədi, Michael Kayode cərimə meydançasında yaranan qarışıqlıqdan istifadə edib topu qapının tavanına sancdı. 3:0. Tottenham üçün real fəlakət.

Bir neçə dəqiqə sonra Brentford hesabı daha da ağırlaşdıra bilərdi. Rodrigo Bentancur meydanda cəmi bir neçə dəqiqə idi ki, idi, artıq penaltiyə səbəb oldu. Lakin Igor Thiago on bir metrlik cərimə zərbəsindən dirəyə tuş gəldi. Bu, hesabı dəyişməsə də, oyunun mənzərəsini tam əks etdirirdi: Brentford istədiyini edirdi, Tottenham isə yalnız zərbələri udurdu.

100 milyonluq Tonali üçün unudulası debüt

Bu axşamın ən çox diqqət çəkən fiqurlarından biri Sandro Tonali idi. Klub rekord məbləğ – 100 milyon funt qarşılığında gətirilən italyan yarımmüdafiəçi ilk rəsmi matçında meydanın mərkəzində tamamilə uduzdu. Qarşısında duran Mamadou Sangare onu demək olar ki, hər epizodda kölgədə qoydu.

Tonali bəzən bir toxunuşlu ötürmələrlə oyuna sürət qatmağa çalışdı, amma bu, yalnız kiçik detallar səviyyəsində qaldı. Ümumi mənzərə – itirilmiş ikili mübarizələr, ritmi ələ ala bilməmək və mərkəzdəki boşluqlar – onun üçün ağır debüt portreti yaratdı. Nəticədə qiyməti də sərt oldu: 3.

Müdafiə xətti dağılır

Qapıçı Antonin Kinsky üçün də axşam uğurlu alınmadı. Jensene qarşı etdiyi seyv Brentford-un ikinci qoluna birbaşa səbəb oldu, fasilədən sonra Kayode-nin qol epizodunda da topu təhlükəli zonadan kənarlaşdırmaqda gecikdi. Qiymət – 4.

Arxa xəttin ümumi durumu da fərqli deyildi. Klub tarixində ən gənc kapitan kimi meydana çıxan Archie Gray üçün bu, tarixi gündən çox travmatik xatirə oldu. Brentford hücumçularını nə sürətdə, nə də fiziki mübarizədə saxlaya bildi – 4.

Jan Paul van Hecke arxa xəttə sərtlik və liderlik gətirməli idi, amma rəqib onu hava toplarında da, yerə yaxın epizodlarda da üstələdi. Altı hava mübarizəsindən yalnız ikisinin qalibi oldu və Brentford-un hava üstünlüyü Tottenham-ın başı üzərində asılı qaldı – 4.

Marcos Senesi bəzi epizodlarda topu irəli daşımaqla, xətləri yarmaqla seçilsə də, fiziki mübarizədə rəqibə çata bilmədi. Daim arxaya baxaraq oynadı, arxaya atılan toplar onu çətin vəziyyətdə qoydu – 5.

Sol cinahda Andy Robertson üçün də bu, ağır sınaq idi. Dango Ouattara-nın tempi və enerjisi onu sanki oyunun sonuna qədər qovdu. Şotland müdafiəçi üçün ilk rəsmi matç çox ağrılı keçdi – 5.

Mərkəzdə boğulanlar

Lucas Bergvall üçün axşam tam bir boğulma səhnəsinə çevrildi. Topla olanda səliqəli idi, hücum zonasında özünü göstərməyə çalışdı, amma top Tottenham-da olmayanda sanki meydandan silinirdi. Brentford-un pressinqi onu əzdi. Üstəlik, Richarlison-un onu çətin vəziyyətə salan ötürməsi Brentford-un ikinci qolunun başlanğıcı oldu – 3.

Conor Gallagher isə nə oyuna yaradıcılıq qata bildi, nə də komandanı emosional olaraq oyunda saxladı. Mübarizə apardı, rəqibin aqressiyasına cavab verməyə çalışdı, amma Tottenham-ın bütöv oyunu o qədər dağınıq idi ki, bu səylər boşa getdi – 4.

Hücum xətti: itirilmiş şanslar və görünməyən forvardlar

Mike Moore üçün axşamın dönüş nöqtəsi ola biləcək epizod vardı. Andy Robertson onu arxa dirəkdə tapdı, qol fürsəti aydın idi, amma hücumçu bu şansı dəyərləndirə bilmədi. Oyunun sonlarında da Kelleher-dən yaxşı seyv çıxartdı, amma orada da qolu vura bilmədi. Az sayda imkandan heç birini reallaşdıra bilməməsi 4-lük qiymətlə nəticələndi.

Richarlison isə ön xətdə topu saxlamaq, komandanı irəli çıxarmaq üçün nəzərdə tutulmuşdu, amma tam əks mənzərə yarandı. Onun zəif saxlanılan topları Brentford-a yenidən hücuma çıxmaq üçün fürsət verdi. Bergvall-ı çətin vəziyyətə salan ötürməsi ikinci qola gətirib çıxardı. Məyusedici çıxış – 3.

Mathys Tel isə demək olar ki, görünmədi. Kayode ilə ayaqlaşmaqdan çəkinən, ön xəttdə təşəbbüs almayan hücumçu rəqib müdafiəçisini öz yarımmeydanına rahat yerləşdirdi. Bu da Tottenham-ın sağ cinahını tamamilə kilidlədi – 4.

Əvəzetmələr də oyunu xilas etmədi

Meydana sakitlik gətirməli olan Rodrigo Bentancur əksinə, xaosu artırdı. Girişindən az sonra penaltiyə səbəb oldu, oyunda ən çox qayda pozuntusu edən Tottenham futbolçusu kimi yadda qaldı – 4.

Mateus Fernandes topa sahib olanda təmiz, səhvsiz oynadı, amma komandanın ehtiyacı olan radikal dəyişiklik deyildi. Hesabı dəyişmək üçün lazım olan kəskinliyi gətirə bilmədi – 6.

Dominic Solanke isə Richarlison-un əvəzinə daxil olsa da, oyuna heç bir təsir göstərmədi. Cəmi altı toxunuş, ritmdən tamamilə kənar görünüş – 4.

James Maddison meydana daxil olanda artıq hər şey demək olar ki, həll olunmuşdu. O da oyuna ciddi təsir göstərə bilmədi, amma bunun günahını ona yazmaq çətindir – 5.

Destiny Udogie üçün bu, daha çox bərpa yolunda atılan ilk addımlar idi. Oyunun axarını dəyişmək üçün əlindən gələni etsə də, Brentford-un dalğa-dalğa hücumlarının qarşısını almaq mümkün deyildi – 5.

Tottenham üçün bu məğlubiyyət sadəcə pis start deyil, həm də xəbərdarlıqdır: bu qədər sərmayə, bu qədər yeni sima ilə belə, Premyer Liqa səviyyəsində fiziki gücə, ritmə və aqressiyaya cavab verə bilmirsənsə, növbəti həftələrdə nə baş verəcək?