Tottenham'ın Zədə Durumu: De Zerbi'nin Ümidləri
Tottenham mövsümə kabus kimi giriş edib. “Brentford” səfərində 0:3-lük darmadağın, böyük xərclərlə yenilənmiş komanda üçün elə ilk gündən soyuq duş oldu. Roberto De Zerbi matçdan sonra bir şeyi gizlətmədi: onun komandası hələ Premyer Liqa ritminə fiziki olaraq hazır deyil.
Klub hazırda yeddi əsas oyunçusundan məhrumdur. Amma bu həftə tunelin sonunda işıq görünməyə başlayıb. Çərşənbə günü “Carabao Cup”da “Charlton”la duel, ardınca şənbə günü mövsümün ilk ev liqa oyunu – “Newcastle” səfərə gəlir. Və məhz bu sıx həftə De Zerbi üçün kiçik də olsa tibbi qələbələrlə yadda qala bilər.
Kapitan kənarda: Micky van de Ven sürət yığır
Yeni klub kapitanı Micky van de Ven mövsümə meydanın mərkəzində yox, “Brentford Stadium”un kənarında başladı. Müdafiəçi yay toplanışında aldığı zədə səbəbindən bir dəqiqə də olsun oynaya bilmədi, indi isə həm fiziki, həm ritm baxımından geridən gəlir.
De Zerbi ötən həftə jurnalistlərlə söhbətdə belə danışmışdı: “Cümə günü komandaya qoşuldu, hər şey yaxşı gedir. Avstraliyada hazırlıq dönəmində problem yaşadı, uçuş, nəsə – bilmirəm. Böyük zədə deyil, amma normal işləməyə mane olurdu”.
Artıq o, komanda ilə məşqlərə qayıdıb və hədəf aydındır: ilk ev oyunu. Klub daxilindən gələn siqnallara görə, texniki heyət Van de Ven-i “Newcastle” qarşılaşmasına qədər tam hazır vəziyyətə gətirməyə çalışır.
Gözlənilən dönüş tarixi: “Newcastle” (ev), 29 avqust 2026
Pedro Porro da sıraya yaxınlaşır
Birinci vitse-kapitan Pedro Porro da “Brentford”da komandasına yalnız tribunadan baxdı. İspaniya millisinin dünya çempionluğundan sonra gec qayıtdığı üçün yay hazırlığını faktiki olaraq qaçırdı və bu da onu mövsümün startından kənarda qoydu.
İndi isə tablo dəyişir. Porro yenidən ümumi məşqlərdədir, üç həftəlik fasilədən sonra fiziki hazırlığını bərpa edir. Klub onu da Van de Ven kimi eyni tarixə – “Newcastle” oyununa yetişdirməyə çalışır. Sağ cinahdakı dinamika məhz onun dönüşündən keçir.
Gözlənilən dönüş tarixi: “Newcastle” (ev), 29 avqust 2026
Mohammed Kudus: “Demək olar hazırdır”
Mohammed Kudus üçün bu, sonsuz gözləmə kimi görünə bilər. Qanalı ulduz yanvardan bəri rəsmi oyuna çıxmayıb. Amma indi nəhayət ki, üfüqdə dönüş var.
O, bud əzələsindən əməliyyat keçirib, ötən həftə ailəsindəki itki səbəbindən vətəninə qayıtdı, artıq yenidən bazadadır və komanda ilə məşq edir. De Zerbi-nin sözlərinə görə, işlər ümidvericidir: “Kudus demək olar hazırdır, bu, bizim üçün böyük məsələdir. Oyunçuların idarə olunması vacibdir, problem olanda sakit qalmalı, riskə getməməliyik”.
Plan aydındır: onu tələsmədən, amma itkisiz şəkildə sentyabrın əvvəlində meydana qaytarmaq.
Gözlənilən dönüş tarixi: “Nottingham Forest” (səfər), 5 sentyabr 2026
James Maddison: çiyin qorxusu
James Maddison üçün mövsümün ilk günü rahat keçmədi. “Brentford”a qarşı oyunda ehtiyatdan meydana daxil oldu, amma komandanın axarını dəyişə bilmədi. Daha pisi – uğursuz enişdən sonra çiynində ağrı hiss etdi.
Hazırda onun “Charlton”a qarşı “Carabao Cup” matçında iştirakı sual altındadır. Maddison hələ də oyun praktikasını bərpa etməyə çalışır, bu cür xırda, amma narahatlıq yaradan zərbələr isə ritm tutmasını ləngidir.
De Zerbi-nin onunla bağlı son sözü çərşənbə axşamı keçiriləcək mətbuat konfransında olacaq. Klub daxilində əsas hədəf yenə eynidir: onu “Newcastle” matçına tam vəziyyətdə çatdırmaq.
Gözlənilən dönüş tarixi: “Newcastle” (ev), 29 avqust 2026
Pape Matar Sarr: ehtiyatlı pauza
Pape Matar Sarr üçün də mövsüm startı tribunadan izləməklə başladı. Ötən həftə məşqlərin birində arxa bud əzələsində ağrı hiss etdi və “Brentford” matçını buraxdı.
Sarr yay toplanışında normal oynasa da, bu “kiçik” zədə onun ritmini pozdu. De Zerbi bunu belə izah etdi: “İki gün əvvəl hamstringində ağrı hiss etdi. Vacib bir şey deyil, amma biz onunla riskə getmirik, xüsusən də bu mərhələdə”.
Sarr-a başqa bir amil də təsir edir: ona qarşı transfer marağı getdikcə artır. Klub isə həm bazar, həm meydan balansını qorumaq üçün onu tam sağlam görmək istəyir.
Gözlənilən dönüş tarixi: “Newcastle” (ev), 29 avqust 2026
Dejan Kulusevski: uzun yolun ortasında
Dejan Kulusevski üçün bu, təkcə idman yox, həm də insan hekayəsidir. İsveçli ulduz “Tottenham” forması ilə sonuncu dəfə təxminən 18 ay əvvəl rəsmi oyuna çıxıb. Ciddi diz zədəsi onu uzun müddət kənarda saxladı, indi isə o, nəhayət ki, yenidən meydançaya qayıtmaq üçün çalışır.
Hazırda Kulusevski komanda ilə deyil, fərdi məşqçi ilə işləyir. De Zerbi onu yaxından izlədiyini gizlətmir: “Onu çox müşahidə edirəm, çünki hər şeydən əvvəl o, çox əziyyət çəkib. İnsan olaraq onun üçün çox çətin dövr olub və hamımız bu müddətdə onun yanındayıq. O, fərqli futbolçudur, xüsusi oyunçudur. Sağlam və hazır olanda komandaya tamam başqa ölçü verir, Xavi Simons kimi”.
Dəqiq tarix yoxdur, amma klubun daxili planlaşdırmasında bir hədəf var: mövsümün ilk yarısında onu yenidən rəqabətə qaytarmaq.
Gözlənilən dönüş tarixi: Naməlum
Xavi Simons: uzunmüddətli itki
Xavi Simons şənbə günü “Brentford Stadium”da idi, amma formanı yox, sadəcə gödəkçəni geyinmişdi. Komanda yoldaşlarını tribunadan dəstəklədi, özü isə hələ uzun müddət kənarda qalacaq.
Niderlandlı ulduz ötən mövsümün son oyunlarında ön çarpaz bağ (ACL) zədəsi aldı və təxminən doqquz aylıq pauzaya məhkum edildi. Klub onu tələsməyəcək, risk etməyəcək. Plan – gələn ilin əvvəlində meydanlara qaytarmaqdır.
Gözlənilən dönüş tarixi: 2027-ci ilin əvvəli
Wilson Odobert: eyni zədə, fərqli təqvim
Wilson Odobert üçün də diaqnoz eynidir – ön çarpaz bağ zədəsi. Amma o, bu zədəni Xavi Simons-dan bir neçə ay əvvəl alıb. Bu da o deməkdir ki, təqvim onun xeyrinə işləyə bilər.
Klub ümid edir ki, Odobert 2026-cı ilin sonuna qədər yenidən yaşıl meydanlarda olacaq. Cinahdakı sürəti və cəsarətli oyunu “Tottenham”ın hücum xəttinə əlavə silah gətirə bilər, amma hər şey reabilitasiyanın problemsiz keçməsindən asılıdır.
Gözlənilən dönüş tarixi: 2026-cı ilin sonu
Fəlakətli start, ağır nəticə, dolu tibbi otaq. Amma bu həftə “Tottenham Hotspur Stadium”a qayıdışla birlikdə bir sual daha sərt səslənəcək: geri dönənlər bu komandanı ayağa qaldırmağa yetəcək, yoxsa De Zerbi-nin inqilabı hələ çox gözlətməli olacaq?
