Trent Alexander-Arnold üçün Madrid kabusu: Arsenal-a qayıdış mümkün mü?

Trent Alexander-Arnold üçün “Real Madrid”də ilk mövsüm nə xəyallara uyğun oldu, nə də statusuna. Anfield-dən Bernabéu-ya keçid onun üçün yeni zirvələr açmalı idi, amma mövsüm boyu yaşanan uyğunlaşma problemi, zədələr və “Los Blancos”un ümumi dalğalanan forması sonda kuboksuz qalan, narazı bir nəhəng portreti yaratdı.

Bu xaosun içində Trent də itdi.

Sabitlik tapa bilmədi, ritmini qurmadı, oyuna damğa vuran o tanış krossları və meydanı yarıb keçən ötürmələri yalnız epizodlarda xatırlatdı. Formadakı eniş, üstəgəl komandanın ümumi uğursuzluğu – nəticə özünü tez göstərdi: Thomas Tuchel onu Dünya Çempionatına aparmadı.

Cole Palmer və Phil Foden kimi digər ingilis ulduzlarına qarşı da sərt xətt seçən Tuchel, Alexander-Arnold üçün də qapını açıq saxlamadı. Bu, sadəcə siyahıdan kənarda qalmaq deyildi. Bu, karyera üçün xəbərdarlıq siqnalı idi.

Mourinho dövrü və Dumfries rəqabəti

İndi isə Trent üçün həlledici mövsüm yaxınlaşır. “Real Madrid”də sağ cinahda artıq tək deyil. Denzel Dumfries gəlir və bu, birbaşa meydanda nəfəs alan rəqabət deməkdir.

Kənardan baxanda mənzərə aydındır: sərt, tələbkar, səhvlərə qarşı sıfır tolerantlığı ilə tanınan Mourinho kənarda dayanacaq, qarşısında isə özünü yenidən sübut etməli olan, amma artıq bir dəfə zirvəni görmüş bir müdafiəçi.

Mourinho üçün sağ cinah müdafiəçisi ilk növbədə intizam, mövqe oyunu və müdafiə sabitliyi deməkdir. Trent isə illərdir hücum potensialı, yarımmüdafiəçi kimi oyunu oxuma bacarığı və topa münasibəti ilə fərqlənib. Bu ziddiyyət ya onu yeni səviyyəyə daşıyacaq, ya da yolların ayrılmasına gətirib çıxaracaq.

Məhz buna görə İngiltərədə başqa ssenari daha çox səslənməyə başlayıb.

İngiltərədən çağırış: “Arsenal” variantı

“Premier League”də bir çoxları hesab edir ki, Alexander-Arnold üçün ən məntiqli addım geri dönüş ola bilər. Sadəcə geri dönüş yox, düzgün mühitə qayıdış.

Söhbət “Arsenal”dan gedir.

“Real Madrid” heyəti yenidən qurmaq üçün satışa məcburdur, yeni transferləri maliyyələşdirmək üçün ayrılacaq adlar lazımdır. Bu fonunda Trent kimi yüksək dəyərli, amma tam uyğunlaşmamış futbolçu təbii olaraq ehtimal olunan çıxış qapılarından birinə çevrilir.

Məhz bu nöqtədə səhnəyə Teddy Sheringham çıxır. “Manchester United”, “Tottenham” və İngiltərə millisinin sabiq hücumçusu, texniki cəhətdən güclü komandalarda oynamağın nə demək olduğunu yaxşı bilən bir səs.

Onun fikrincə, “Arsenal” Alexander-Arnold üçün ideal ünvan ola bilər.

Sheringham “Boyle Sports”a danışarkən bunu açıq şəkildə ifadə edib: “Əgər Trent-i birlikdə işləyən, yaxşı təşkilatlanmış dördlü müdafiə xəttinə yerləşdirsən, bu, ‘Arsenal’ kimi komanda üçün xarakterik olan oyundur”.

Bu cümlənin arxasında sadə, amma güclü bir fikir dayanır: Mikel Arteta-nın komandası struktur üzərində qurulub. Topla oyunda cəsarət, topsuz oyunda sərt intizam. Belə bir sistemdə Trent-in zəif tərəfləri gizlənə, güclü keyfiyyətləri isə maksimuma çıxa bilər.

Sheringham davam edib: “Əgər kimsə Trent-lə bu mənada işləsə, əsas anlarda mövqe seçimini ona öyrətsə, əminəm ki, o, bu rolda inkişaf edə bilər və ‘Arsenal’a komandaya gətirdiyi əlavə ölçünü qazandıra bilər”.

Burada söhbət sadəcə sağ cinah müdafiəçisindən getmir. Bu, oyunun ritmini dəyişən, yarımmüdafiə ilə müdafiə arasında körpü quran, hücuma başqa bucaq verən bir oyunçudan gedir. “Arsenal”ın bəzən sıx müdafiələri yarmaq üçün əlavə yaradıcı impuls axtardığı məqamları xatırlamaq kifayətdir.

Karyera yol ayrıcında

Alexander-Arnold üçün məsələ indi təkcə klub seçimi deyil. Bu, karyerasının növbəti on ilini müəyyən edəcək qərardır.

“Real Madrid”də qalıb Mourinho-nun sərt məktəbindən keçmək? Dumfries ilə hər həftəlik duelə girib özünü tam müdafiəçi kimi yenidən formalaşdırmaq?

Yoxsa “Premier League”ə qayıdıb, Arteta kimi detal sevən, mövqe oyunu üzərində çalışan bir baş məşqçinin əlində yeni rola bürünmək?

Bir tərəfdə Bernabéu-nun təzyiqi və ikinci şansın nadir olduğu mühit. Digər tərəfdə isə artıq formalaşmış, sabit struktura malik, amma hələ də son addımı – titul mentalitetini – tam oturtmağa çalışan “Arsenal”.

Trent Alexander-Arnold bu mövsüm sadəcə forma tapmağa çalışmayacaq. O, kim olmaq istədiyinə qərar verəcək: klassik sağ cinah müdafiəçisi, yoxsa oyunu dəyişən yaradıcı lider.

Və bu qərarın ünvanı Madrid olacaq, yoxsa London – bunun cavabı artıq təkcə ona aid deyil. Klublar, baş məşqçilər və bazar da sözünü deyəcək.