Vitinha transferi: Florentino Perez-in 150 milyonluq planı
Real Madrid prezidentlik yarışında finiş xəttinə yaxınlaşdıqca, Florentino Perez yenə də ən yaxşı bildiyi silaha əl atıb: ulduz transfer vədinə. İspaniyada yayımlanan xəbərlərə görə, bazar günü keçiriləcək seçki öncəsi klub tarixinin ən bahalı gedişlərindən biri üçün səhnə artıq qurulub. Səhnənin mərkəzində isə bir ad dayanır – Vitinha.
Perez-in seçki silahı
Cadena SER-in məlumatına əsasən, PSG-nin portuqaliyalı yarımmüdafiəçisi prezidentlik kampaniyasının bayraqdarına çevrilib. Paris klubunda əsas fiqurlardan birinə dönən, müqaviləsi daha üç il davam edən Vitinha-nın adı getdikcə daha sıx şəkildə Santiago Bernabeu ilə yanaşı çəkilir.
Məsələ sadə deyil. Vitinha PSG üçün struktur oyunçudur, klub onu ucuz qiymətə buraxmayacaq. Amma Madrid tərəfi də bu dəfə kiçik düşünmür. İddialara görə, Perez bir ulduz üçün 150 milyon avroya qədər sərmayə qoymağa hazırdır. Bu məbləğ Vitinha-nı Real Madrid tarixində müzakirə olunmuş ən bahalı hədəflərdən birinə çevirir.
Cümə axşamı axşam saatlarında Perez verdiyi müsahibədə yaxın günlərdə 150 milyon avroluq rəsmi təklif açıqlayacağını bildirib, lakin Harry Kane, Erling Haaland və Michael Olise kimi adları açıq şəkildə kənara qoyub. Bu, dairəni xeyli daraldıb. İspan jurnalist Pacojo Delgado isə bu dairənin mərkəzinə birbaşa Vitinha-nı yerləşdirir.
“Nokaut” planı və Jorge Mendes faktoru
Delgado-nun sözlərinə görə, bu transfer sadəcə idman layihəsi deyil, seçkinin özüdür.
Onun fikri qətiyyətlidir: əgər Florentino Perez seçkini erkən həll etmək istəyirsə, Vitinha-nın elan olunması “son zərbə” ola bilər. Səsvermə qutuları açılmamışdan öncə “nokaut”.
Delgado həm də pərdəarxası ən mühüm fiqurlardan birinə – agent Jorge Mendes-ə işarə edir. Mendes illərdir həm Jose Mourinho, həm də Real Madrid rəhbərliyi ilə sıx əlaqələrə malikdir. Vitinha isə hazırda onun ən parlaq oyunçularından biri hesab olunur.
Delgado sualı açıq şəkildə qoyur: belə bir konfiqurasiyada Mendes, əgər real imkan yaranarsa, öz ən yaxşı oyunçusunu Mourinho üçün əlçatan etməzmi? Cavab Madrid küçələrində artıq verilib kimi görünür – azarkeşlər bu ehtimalı çox ciddi qəbul edir.
Mourinho layihəsinin mərkəzi parçası
Vitinha-nın ardınca gedilən bu xətt tək bir transferdən ibarət deyil. Bu, daha böyük bir planın – Jose Mourinho-nun gözlənilən gəlişi ilə bağlı qurulan yeni layihənin hissəsidir.
Portuqaliyalı yarımmüdafiəçi, Madridə qayıdacağı gözlənilən həmyerlisinin oyununun mərkəzinə yerləşdirilə biləcək tipdə futbolçu kimi görülür. Dinamik, topa nəzarəti sevən, həm pressinqdə, həm də hücumun qurulmasında fəal rol oynayan Vitinha, yenilənmiş yarımmüdafiənin “beyni” obrazına uyğun gəlir.
Real Madrid rəhbərliyi artıq başqa mövqelərdə də addımlar atır. Xəbərlərə görə, müdafiənin mərkəzinə Ibrahima Konate azad agent kimi gətiriləcək. Sağ cinah müdafiəsində isə Denzel Dumfries üçün 20 milyon avroluq sərbəstqalma maddəsi işə salınıb və holland futbolçunun da gəlişi gözlənilir.
Bu hamısı bir yerdə Mourinho üçün yeni skeletdir. Amma həmin skeletə həyat verəcək, ritm qatacaq əsas ad kimi Vitinha göstərilir.
PSG ilə ağır masa, Madrid üçün böyük sınaq
Bütün planların açar nöqtəsi Parisdəki masa ətrafında baş tutacaq danışıqlardır. PSG hələ də Vitinha-nı əsas oyunçulardan biri kimi görür. Onu buraxmaq üçün yalnız böyük məbləğ deyil, həm də inandırıcı layihə lazımdır.
Burada yenə Mendes faktoru önə çıxır. Onun PSG ilə münasibətləri, Real Madrid və Mourinho ilə uzun illərə dayanan əməkdaşlığı, bu çətin masa danışıqlarında bəlkə də yeganə “körpü” rolunu oynaya bilər. Madrid üçün isə bu, təkcə transfer deyil – prezidentlik seçkisinin taleyi, yeni texniki layihənin istiqaməti və Bernabeu-nun gələcək onilliyinin mərkəzi fiqurunu müəyyənləşdirəcək qərardır.
İndi sual budur: Florentino Perez, Vitinha-nı Bernabeu-ya gətirərək seçkini elə start fitindən əvvəl bağlaya biləcəkmi, yoxsa PSG bu 150 milyonluq zərbəni udub oyunu uzatmağa məcbur edəcək? Seçkiyə cəmi bir neçə gün qalıb və cavab, görünür, həm Madrid, həm də Parisdə oyunun qaydalarını dəyişəcək.
