Wayne Rooney-dən Andy Carroll-a sərt cavab: məhkəmə hədəsi
Wayne Rooney keçmiş komanda yoldaşı Andy Carroll-un kitabında yazılanlara görə hüquqi addım atmağa hazırlaşır. Səbəb – milli komanda toplanışlarında içki məclisləri ilə bağlı iddialar.
40 yaşlı sabiq İngiltərə kapitanı, Carroll-un tezliklə çıxacaq avtobioqrafiyasının nəşriyyatına vəkilləri vasitəsilə rəsmi məktub göndərib. Məktubda Rooney-nin İngiltərə millisinin toplanışlarında komanda yoldaşlarını 2010–2011-ci illərdə otağına içkiyə çağırdığı iddiasının yalan olduğu vurğulanır və bu hissənin geri götürülməsi tələb edilir.
Carroll-un “Owning It” adlı kitabında Manchester United əfsanəsinin Three Lions düşərgəsində içki məclislərinə şərait yaratdığı yazılır. İndi isə keçmiş Newcastle və Liverpool hücumçusu bu iddianı geri çəkməsə, bahalı məhkəmə prosesilə üz-üzə qala bilər.
Məsələyə yaxın mənbə britaniyalı tabloidə bildirib ki, Rooney olduqca əsəbidir və zarafat etmir. Onun hüquqşünasları nəşriyyata kəskin məzmunlu məktub göndərib, Rooney bu hissənin çıxarılmasını tələb edir və iddianı “tamamilə yalan” sayır. Mənbənin sözlərinə görə, Rooney öz keçmişini inkar etmir, amma bu dəfə məsələ prinsipə çevrilib.
Eyni mənbə Carroll-un isə yaranmış vəziyyətə görə ciddi gərginlik yaşadığını deyib. Onun gözləmədiyi halda Rooney-nin bu qədər sərt reaksiya verməsi, indi isə kitabın satış planlarını kölgədə qoyması vurğulanır. İddiaya görə, Carroll ya açıq şəkildə üzr istəməli, ya da hüquqi savaş riskini qəbul etməlidir.
Rooney hazırda futbol karyerasından sonrakı həyatında tam başqa istiqamətə dönüb. O, ITV kanalının “I’m A Celebrity… Get Me Out Of Here” şousuna qatılmaq üçün irəliləmiş danışıqlardadır və ötən il eyni proqramda ikinci yeri tutan həyat yoldaşı Coleen Rooney-nin nəticəsini minimum təkrarlamaq niyyətindədir.
2018-ci ildə peşəkar futboldan getdikdən sonra Rooney məşqçiliyə baş vurdu, daha sonra BBC-nin “Match of the Day” proqramında ekspert kimi çıxış etməyə başladı, həmçinin podkast və oyun şousu təqdim etməyə razılıq verdi.
Onun və həyat yoldaşının baş rolda olduğu “The Real Rooneys” adlı yeni Disney+ serialı bu cümə axşamı yayımlanır – təsadüfən elə Andy Carroll-un kitabının satışa çıxacağı gün. Mənbələr bildirir ki, Rooney-nin son aylarda atdığı bütün addımlar karyerasında yeni səhifə açmaq üçündür: o, xeyli arıqlayıb, içkini həyatından çıxarıb və köhnə vərdişlərini arxada qoyub.
Məhz belə bir vaxtda, Carroll-un onu yenidən “köhnə Rooney” obrazına çəkən iddiaları sabiq ulduzun istədiyi son şeydir. İndi sual budur: bu qalmaqal yeni imicini möhkəmləndirmək istəyən Rooney-ni daha da sərtləşdirəcək, yoxsa Carroll geri addım atıb sükutu bərpa edəcək?
