Uels yığmasının kapitan sarğısını illərlə şərəflə daşıyan, “qızıl nəsil”in mərkəzində dayanan Aaron Ramsey karyerasını dərhal qüvvəyə minən qərarla başa vurdu. 35 yaşlı yarımmüdafiəçi artıq peşəkar futbolçu kimi meydana çıxmayacaq və indi ondan meydançanın kənarında – məşqçilikdə – eyni zəkaya ümid edilir.
Bu qərar bir müddətdir havada idi. Meksika klubu Pumas UNAM-dan ötən il ayrıldıqdan sonra Ramsey klubsuz qalmışdı, uyğun layihə tapılmırdı. Nəhayət, o, vaxtın çatdığını qəbul etdi: oyunçu kimi pərdə enir.
Uels üçün qızıl imza
Ramsey Uels futbol tarixində adı silinməyəcək fiqurlardan biridir. 86 oyunda 21 qol – rəqəmlərdən çox, bu qolların gəldiyi anlar yaddaşlara həkk olunub. Üç böyük turnirdə ölkəsini təmsil etdi, amma onun adı ilk növbədə bir turnirlə assosiasiya olunur: Euro 2016.
Fransada Ramsey Uelsin tarix yazdığı yürüşün mərkəzində idi. Komanda yarımfinala qədər irəlilədi, Ramsey isə turnirin ən yaxşılarından biri kimi seçilərək Uefa-nın rəmzi komandasında yer aldı. Sarı vərəqə cəzasına görə Portuqaliyaya qarşı yarımfinalı buraxması hələ də Uels azarkeşlərinin ürəyində yaradır. O komandanın ürəyi, ritmi, tempini təyin edən beyin məhz o idi.
Sonrakı illərdə o, Euro 2020-də, daha sonra isə 64 illik fasilədən sonra gələn möcüzə – 2022 Dünya Çempionatında Uels formasını geyindi. Bu, təkcə turnir deyildi; nəsillərin arzusunun gerçəkləşməsi idi və Ramsey həmin hekayənin ön səhifəsində dayanırdı.
Cardiff-dən London səhnəsinə
Ramsey-nin yolu Cardiff City-də başladı. Orada parlayan istedad 2008-ci ildə onu Arsenal-a gətirdi. London klubu ilə keçirdiyi 11 il həm dramatik zədələrlə, həm də böyük dönüş hekayələri ilə yadda qaldı.
Arsenal azarkeşləri üçün onun adı ilk növbədə kubok finalı qolları ilə bağlıdır. Üç FA Cup qazandı, onların ikisində həlledici zərbə məhz ondan gəldi. Böyük səhnədə, ən gərgin anda məsuliyyəti üzərinə götürən, cərimə meydançasına gec, amma ölümcül daxil olan yarımmüdafiəçi obrazı illərlə “Emirates” tribunalarının sevimli ssenarisinə çevrildi.
Sonra İtaliya mərhələsi gəldi – Juventus, ardınca Fransa – Nice. Qısa müddətli olsa da, hər iki dayanacaq onun beynəlxalq səviyyədə tanınmış oyunçu statusunu daha da möhkəmləndirdi.
Qalibiyyətlərlə yanaşı, ağrılı anlar
Ramsey-nin karyerası yalnız kuboklar və alqışlardan ibarət deyildi. Rangers forması ilə 2022 Europa League finalına çıxması bunun simvolik nümunəsidir. Komanda kuboka bir penalti seriyası qədər yaxınlaşdı, lakin onun qaçırdığı zərbə şotland klubunun ümidlərini puça çıxardı. Bu epizod ağır zərbə idi, amma Ramsey-nin karyerasının tonunu dəyişə bilmədi: o, hər zaman meydanı üzərinə məsuliyyət götürən, riskdən qaçmayan oyunçu kimi tərk etdi.
Sonra dairə bağlandı. O, yenidən uşaqlıq klubu Cardiff City-yə qayıtdı. Bu dəfə təkcə lider kimi yox, həm də mövsümün sonunda qısa müddətlik müvəqqəti baş məşqçi rolunda. Sanki futbol artıq ona yeni bir yol göstərirdi – texniki zonaya aparan yol.
Pumas, son cəhd və qaçan Dünya Çempionatı xəyalları
Ramsey-nin Meksikadakı Pumas addımı da təsadüfi deyildi. O, bədənini formda saxlayıb bu yay baş tuta biləcək Dünya Çempionatında Uels üçün daha bir dəfə meydanda olmağı hədəfləyirdi. Plan aydındı: daha bir böyük səhnə, daha bir turnir, daha bir dəfə himn səslənərkən sıranın önündə dayanmaq.
Amma futbol bəzən ən böyük istəklərə belə sərt cavab verir. Uels həmin turnirə vəsiqə qazana bilmədi, Ramsey isə Meksikanı tərk etdikdən sonra yeni klub tapmadı. Bu boşluq, bu qeyri-müəyyənlik sonda qərarı sürətləndirdi. O, vaxtında dayanmağı seçdi.
Vida sözləri və yeni başlanğıc
Ramsey qərarını sosial şəbəkələrdə açıqladı və emosional mesajında həyatının bütün əsas dayaq nöqtələrinə toxundu. Uels yığmasının formasını geyinməyin onun üçün “xüsusi imtiyaz” olduğunu vurğuladı, illər boyu onunla çalışan bütün baş məşqçilərə və heyət üzvlərinə təşəkkür etdi.
“Red Wall” – Uels azarkeşlərinin məşhur tribunası – üçün yazdığı cümlələr bir futbolçunun azarkeşlərlə münasibətini tam əks etdirirdi. Onları həm uğur, həm də uğursuzluq anlarında yanında olan, komandanın uğurunun “əvəzolunmaz hissəsi” adlandırdı və mesajını bir sözlə möhürlədi: “Diolch”.
Ramsey eyni zamanda karyerası boyu formasını geyindiyi bütün klublara, çalışdığı məşqçilərə, onu ən yüksək səviyyəyə daşıyan insanlara minnətdarlıq bildirdi. Sonda isə ən böyük təşəkkürü ailəsinə ünvanladı – həyat yoldaşı, övladları və bütün ailə üzvləri olmadan bu yolun mümkün olmayacağını yazdı.
İndi isə yeni mərhələ başlayır. Uels futbolunun son onilliklərdəki ən yaradıcı beyinlərindən biri, böyük turnirlərin ritmini müəyyənləşdirən oyunçu indi ehtimal ki, texniki zonada, taktika lövhəsinin arxasında öz izini qoymağa çalışacaq.
Sual budur: Aaron Ramsey məşqçi kimi də Uels futbolunun tarixində eyni dərəcədə dərin iz buraxa biləcəkmi?
