Said El Mala adı yenidən transfer gündəminin mərkəzinə qayıdır. Cəmi 19 yaşı var, amma artıq bir neçə klubun planlarını dəyişdirib.
Uzun müddətdir ki, Brighton & Hove Albion gənc hücumçunun izindədir. İngiltərə təmsilçisi son həftələrdə bir neçə dəfə təkliflə Köln qapısını döyüb, amma hər dəfə eyni cavabla üzləşib: “Yox”. Klub rəsmiləri təklifləri rədd edib, danışıqlar ilişib qalıb.
Məlumata görə, şəxsi razılaşma tərəflər arasında artıq praktiki olaraq hazırdır. Brighton və El Mala şərtləri müəyyənləşdirib. Problem başqa yerdədir: “qarğalar” 35 milyon avrodən yuxarı çıxmaq istəmir. Köln isə bu məbləğə asanlıqla “bəli” demək niyyətində deyil.
Chelsea də oyuna daxil olur
Səhnədə yalnız Brighton yoxdur. Böyük Britaniyadan başqa bir nəhəng də hərəkətə keçib. Chelsea FC də Said El Mala ilə maraqlanan klublar sırasına qoşulub və bu, oyunun qaydalarını dəyişə bilər.
Sport-Bild-in məlumatına görə, gənc futbolçu yenidən peşəkar məsləhət almağı, yeni agentlə işləməyi düşünür. Son həftələrdə onun işlərini ailəsi idarə edib. İndi isə görünür, danışıqların növbəti mərhələsinə keçid üçün daha təcrübəli nümayəndəlik axtarılır. Bu da o deməkdir ki, qarşıdakı günlərdə masaya yeni şərtlər, yeni rəqəmlər gələ bilər.
Köln-in əlində bütün kozırlar
Köln tərəfi isə təlaşdan uzaqdır. Klub daxildə öz problemlərini həll etməklə məşğuldur. Zəif nəticələr fonunda baş məşqçi Lukas Kwasniokla yollar ayrılıb, sükan arxasına Rene Wagner gətirilib. Bu dəyişikliklərin fonunda El Mala məsələsi tələskənlik olmadan, beynəlxalq fasilə dönəmində masaya yatırılacaq.
Burada Köln-ün üstün mövqeyi açıq görünür. El Mala-nın müqaviləsi 2030-cu ilə qədər qüvvədədir. Müqavilədə azadlıq bəndi yoxdur. Yəni klub istəməsə, heç kim onu bu yay rahatlıqla ala bilməz. Bu, Almaniya təmsilçisinə həm vaxt, həm də qiymət baxımından ciddi manevr imkanı verir.
Klub eyni zamanda önəmli bir maliyyə detalını da həll edib. Xəbərlərə görə, Köln, El Mala-nın əvvəlki klubu Viktoria Köln-in gələcək transferdən olan 10 faiz payını satın alıb. Bunun üçün təxminən 2 milyon avro ödənilib. İndi potensial böyük satışdan gələcək gəlirin hamısı faktiki olaraq Köln-ə qalacaq. Bu da klubun mövqeyini daha da sərtləşdirməyə imkan verir.
19 yaşında Bundesliga səhnəsini silkələyən gənc
El Mala-nın bu qədər diqqət çəkməsi təsadüfi deyil. Bundesliga-da debüt mövsümündə o, artıq komandanın hücum xəttində əsas simalardan birinə çevrilib.
19 yaşlı futbolçu indiyədək 27 oyunda meydana çıxıb, 10 qol vurub və 4 qolun ötürməsini verib. Bu rəqəmlər təkcə istedadı deyil, həm də qərarlılığını göstərir. Belə tempdə inkişaf edən gənc hücumçu üçün 35 milyon avro bu gün real görünə bilər, amma sabah bu rəqəm tam başqa səviyyəyə qalxa bilər. Köln də bunu çox yaxşı anlayır.
Brighton limitini müəyyənləşdirib, Chelsea kənardan təzyiqi artırır, oyunçu özü isə karyerasının növbəti addımı barədə yenidən düşünür. Köln isə sakit şəkildə saatı öz xeyrinə işləməyə qoyub.
Sual indi budur: bu yay El Mala Premyer Liqa səhnəsinə çıxacaq, yoxsa Köln onu bir mövsüm də Bundesliqa tribunalarına saxlayacaq?
