Paris məhkəmə zalları bir vaxtlar Premyer Liqada rəqibləri silkələyən Samir Nasri üçün indi tamam başqa cür səs verir. Bu dəfə söhbət nə zərbələrdən, nə də qolların estetikliyindən gedir. Mərkəzdə vergi, milyonlar və… Deliveroo sifarişləri dayanır.
Deliveroo fişləri ilə qurulan vergi işi
Fransa vergi orqanları iddia edir ki, keçmiş Manchester City yarımmüdafiəçisi 2018–2025-ci illəri əhatə edən dövrdə ölkəyə 5,5 milyon avrodan çox sərvət və gəlir vergisi borcludur. Rəqəm hələlik yekun deyil, amma məhkəmə sənədlərində göstərilən təxmini məbləğ budur.
Mart ayında Paris məhkəməsi Nasrinin bəzi aktivlərinin müvəqqəti müsadirəsinə yaşıl işıq yandırıb. Qərara əsasən, onun bir sıra bank hesablarına blok qoyulub, paytaxtdakı daşınmaz əmlaklarından birinə isə müvəqqəti ipoteka şərti tətbiq olunub. Məqsəd: gələcəkdə mümkün vergi borcunun ödənilməsini təmin etmək.
Bu işin ən çox müzakirə olunan detalı isə hüquqi terminlər yox, gündəlik həyatın adi vərdişləridir. Məhkəmə qərarında Nasrinin Fransada vergi rezidenti sayılması üçün arqumentlər sırasında Deliveroo vasitəsilə Paris ünvanına göndərilən yemək sifarişləri və aviabilet rezervasiyaları yer alıb.
Sənədlərə görə, keçmiş Fransa yığma üzvü 2021–2023-cü illər arasında Fransada ümumilikdə 487 gün, Birləşmiş Ərəb Əmirliklərində isə 226 gün keçirib. Həmin sənədlər iddia edir ki, təkcə 2022-ci ildə Nasrinin Parisdəki ünvanlarından birinə Deliveroo ilə 212 dəfə yemək göndərilib.
Vergi xidməti üçün bu rəqəmlər, aydın şəkildə, sadəcə statistika deyil. Onlar Nasrinin faktiki həyat mərkəzinin Paris olduğunu sübut etməyə hesablanıb.
“212 Deliveroo ilə rezidentlik sübut olunmur”
Nasrinin vəkili Jean-Noël Sanchez bu yanaşmanı ədalətsiz hesab edir və qərardan apellyasiya şikayəti verib. Onun arqumenti kəskindir: ortada yekun vergi qərarı yoxdur, iddia olunan 5,5 milyon avro isə “xəyal məhsulu”dur.
Sanchez-ə görə, mübahisə olunan əsas məsələ Nasrinin harada yaşamasıdır. Vəkil bildirir ki, futbolçu rəsmi olaraq Birləşmiş Ərəb Əmirliklərində, partnyoru və məktəbə orada gedən oğlu ilə birlikdə məskunlaşıb. O, Fransada qazandığı gəlirlər üçün bəyannamə verir və vergi ödəyir, amma tam vergi rezidenti kimi deyil.
“Fransa cənab Nasriyə – və ümumiyyətlə Əmirliklərdə yaşayanlara – qarşı hücuma keçib,” – deyə vəkil mövqeyini sərtləşdirib. Onun fikrincə, vergi orqanları hazırda Fransadan kənarda məskunlaşan yüksək gəlirli şəxslərə sistemli şəkildə təzyiq göstərir.
Deliveroo arqumentinə gəlincə, Sanchez bunu hüquqi cəhətdən zəif sayır. O, haqlı olaraq sual qoyur: sifarişləri məhz Nasrinin özü verdiyini kim sübut edib? Anası, bacısı, qardaşı, dostları – həmin ünvandan istifadə edən hər kəs ola bilər. Vəkil iddia edir ki, təkcə 212 dəfə gətirilən yeməklə bir insanın vergi rezidentliyini təsdiqləmək mümkün deyil.
Onun əsəbi tonu da təsadüfi deyil: “Məni qəzəbləndirən odur ki, təqsirsizlik prezumpsiyası ayaq altına atılır,” – deyə o, vurğulayır.
Futbol meydanından vergi tribunalına
Marseille və Arsenal formaları ilə ad qazanan, Manchester City-də parlayan, Fransa yığmasının sabiq yarımmüdafiəçisi indi tam başqa cür oyunun içindədir. Bu dəfə rəqib mərkəzdə pressinq quran yarımmüdafiəçilər yox, Fransanın vergi administrasiyasıdır.
Mübahisə illərlə davam edə bilər. Apellyasiya prosesi yeni sübutlar, yeni rəqəmlər, yeni hüquqi fəndlər deməkdir. Hər iki tərəf mövqeyini möhkəmləndirməyə çalışacaq: biri Deliveroo qəbzlərinə, uçuş tarixlərinə, Fransada qaldığı günlərin sayına söykənəcək, digəri isə ailə həyatı, gündəlik yaşayış mərkəzi və rəsmi sənədlərlə Dubaydakı məskunlaşmanı önə çəkəcək.
İndi əsas sual budur: sabiq oyunçu bu oyunu öz xeyrinə çevirə biləcək, yoxsa karyerası ərzində rəqib müdafiələri necə yarırdısa, indi də Fransa vergi sistemi onu eyni qətiyyətlə sıxışdıracaq?
