2025 Afrika Millətlər Kubokunun finalı oynanmadı, amma dalğası hələ də səngimir. Qitə futbolunun ən böyük səhnəsi indi hüquq müstəvisində, siyasi tribunlarda və küçə söhbətlərində davam edir. Səbəb bəllidir: CAF-ın titulu “kağız üzərində” Mərakeşə verməsi.
Bu qərar Senegalda partlayış effekti yaratdı. Yalnız sosial şəbəkələrdə deyil, federasiya kabinetlərində, parlament dəhlizlərində, hətta hökumət dairələrində də. Ədalətsizlik ittihamları, şəffaflıq tələbləri, CAF-a inamın sarsılması – hamısı bir-birinə qarışıb.
Senegal geri çəkilmir
Senegal Futbol Federasiyası susmadı. Ölkə, finaldan geri çəkilməsini “qaçılmaz və məcburi şərait”lə əsaslandıraraq, işi birbaşa İdman Arbitraj Məhkəməsinə – CAS-a daşıdı. Mesaj aydındır: bu final masa arxasında deyil, ədalət meydanında həll olunmalıdır.
Afrika futbolu isə bu müddətdə misli görünməmiş böhran yaşayır. Qitənin ən güclü yığmalarından biri özünü haqsızlığa məruz qalmış hiss edir, çempionluq isə meydanda deyil, sənədlərdə sahibini tapıb. Bu, azarkeşlərin yaddaşında uzun illər qalacaq bir ləkə riski daşıyır.
CAF gərginliyi yumşaltmağa çalışsa da, yaydığı “balanslı” bəyanatlar Dakarda havada asılı qalıb. Küçədə emosiyalar, tribunada qürur, siyasətdə isə təzyiq artır. Elə bu fon da Patrice Motsepe-ni şəxsi müdaxiləyə məcbur etdi.
Motsepe Dakarın yolunu tutur
Afrika futbolunun bir nömrəli adamı indi sözünü kənardan deyil, birbaşa Dakarın özündə demək niyyətindədir. Mətbuat yazır ki, CAF prezidenti Patrice Motsepe yaxın saatlarda Seneqal paytaxtına enəcək. Missiya aydındır: tonları yumşaltmaq, dialoq kanallarını açmaq, qarşıdurmanı idarə olunan müzakirəyə çevirmək.
Seneqallı jurnalist Lassana Camara-nın məlumatına görə, səfər kifayət qədər həssas gündəmlə planlaşdırılıb. Motsepe əvvəlcə Senegal Futbol Federasiyasının prezidenti Abdoulaye Fall ilə görüşəcək. Ardınca isə ölkə prezidenti Bassey Diomaye Faye ilə qapalı görüş nəzərdə tutulur. Bu, artıq sadəcə idman danışıqları deyil, siyasi çəkisi olan bir dialoqdur.
Məqsəd aydındır: yeni hüquqi addımlar atılmamışdan əvvəl tərəflər arasında etimadı müəyyən qədər bərpa etmək, ən azı, açıq qapı saxlamaq.
“Teranga”nın qapısı açıqdır
Bütün gərginliyə baxmayaraq, Dakar Motsepe-ni sərt bəyanatlarla yox, klassik Seneqal kimliyi ilə – “Teranga” ilə qarşılayacağını elan edib. Abdoulaye Fall açıq mesaj verdi: ölkə qapılarını bağlamır.
O, video müraciətində xatırlatdı ki, Senegal “Teranga diyarı”dır və “Teranga” qonaqpərvərlik, səxavət deməkdir. Sözləri sadə, amma yüklü idi: “Biz bütün afrikalıları Senegalda qarşılayırıq. Prezident Motsepe gəlmək qərarına gəlib. O, qəbul olunacaq. Biz hamımız afrikalıyıq və bu ölkə onun ölkəsidir də.”
Bu ton, Senegaldakı hiddətin yoxa çıxdığı anlamına gəlmir. Amma oyunun qaydalarının hələ də dialoqla yazıla biləcəyinə işarə edir. Səslənən mesaj budur: “Biz narazıyıq, amma qapını çırpmırıq.”
Afrika futbolunun imici sınaqda
Motsepe-nin Dakar səfəri yalnız bir federasiya ilə barışıq gəzintisi deyil. Bu, Afrika futbolunun imici üçün dönüş nöqtəsi ola bilər. Çünki bu böhran artıq sadəcə Senegal–Mərakeş mübahisəsi deyil; CAF-ın mübahisələri necə idarə etdiyinə dair sınaqdır.
Qitə futbolunun ali qurumu indi sübut etməlidir ki, ən çətin anda belə birliyi, məsuliyyəti və ədaləti önə çəkə bilir. Əks halda, 2025 Afrika Millətlər Kubokunun xatirəsi kuboku qaldıran komandanın sevinci ilə deyil, tribunada qalan sualla yadda qalacaq:
Afrika futbolu öz ən böyük finalını həqiqətən harada itirdi – meydanda, yoxsa masada?
