Parc des Princes bu dəfə yalnız Çempionlar Liqasının 1/4 finalını yox, iki fərqli dünyanın toqquşmasını görəcək. Bir tərəfdə Luis Enrique-nin dörd oyundur rəqiblərini rahatlıqla aşan, az qala avtomatik rejimə keçmiş PSG-si. O biri tərəfdə isə ağır zərbə almış, amma adı hələ də altıqat Avropa çempionu statusu ilə qorxudan Liverpool.
Bu dəfə meydan, forma, ritm – hamısı Paris klubunun tərəfindədir.
PSG – tam güclə, tam fokusla
PSG son dörd rəsmi matçını eyni ssenari ilə keçib: üstünlük, erkən qol, oyunun idarə olunması və ən azı iki top fərqi ilə qələbə. Son olaraq Toulouse 3:1 hesabı ilə Parisdən əliboş yollandı. Ondan əvvəl isə Nice 4:0, Parc des Princes-də Chelsea-yə 5:2, Londonda isə 3:0.
Ligue 1 rəhbərliyinin Lenslə matçı təxirə salması Paris klubunun xeyrinə işləyib. Turnir cədvəlinin zirvəsində dörd xallıq təhlükəsiz məsafə, təqvimdə isə Liverpool qarşılaşmasına qədər boşluq. Bu, Çempionlar Liqasına tam konsentrasiya üçün ideal şəraitdir.
Komanda hücumda alovlanıb: son dörd qələbədə 15 qol, cəmi 3 buraxılan top. Son 16 oyunun hamısında qol vurublar. Evdə Çempionlar Liqasında isə ardıcıl doqquz matçdır hesabda öz adlarını yazdırırlar. Parc des Princes indi rəqiblər üçün yalnız səfər yox, sınaq meydanıdır.
Liverpool – ağır zərbə, açıq suallar
Liverpool Parisə gəlməzdən az əvvəl ciddi sarsıntı yaşadı. FA Cup 1/4 finalında Manchester City-dən 0:4. Erling Haaland het-trik, paltardəyişmə otağında isə başqa bir ağır xəbər: mövsümün sonunda Mohamed Salah-ın ayrılığı artıq rəsmən gözlənilir.
Arne Slot-un komandası bu mövsüm Çempionlar Liqasında müəyyən stabilik göstərsə də, səfər matçlarında eyni sözləri demək çətindir. Son səfər oyunu Galatasaray-a 0:1 məğlubiyyətlə bitmişdi, həqiqi cavab isə yalnız Anfield-də 4:0 hesablı qələbə ilə gəldi. Ümumilikdə isə son yeddi səfər matçından yalnız birində iki və ya daha çox qol vurublar.
Liverpool-un son beş oyunun ikisində ümumiyyətlə qol vura bilməməsi də diqqətdən qaçmır. Manchester City-yə qarşı penaltidən yararlana bilməyən Salah həmin epizodu xatırlayacaq. Çünki belə anlar bu səviyyədə mövsümün taleyini dəyişir.
Bir maraqlı detal: Liverpool-un son 22 səfər Çempionlar Liqası matçından heç biri heç-heçə bitməyib. Ya tam zərbə, ya tam cavab.
Qol yağışı üçün bütün şərtlər hazırdır
Rəqəmlər eyni istiqaməti göstərir: Parisdə qolların sayı az olmayacaq.
PSG-nin son beş rəsmi oyunundan dördündə, evdə keçirdiyi son altı matçdan beşində hesab 3,5 qol həddini keçib. Parislilərin oyunu indi yalnız nəticə yox, ritm üzərində qurulub. Müdafiəçilər də irəli çıxır, yarımmüdafiəçilər temp salmır, cinah oyunçuları fasilə tanımır.
Liverpool bu mövsüm Çempionlar Liqasında orta hesabla hər oyunda 2,40 qol vurur. Son üç rəsmi matçdan ikisi də 3,5 qol həddini keçib. Yeganə istisna – Premyer Liqada Brighton & Hove Albion-a 1:2 hesablı məğlubiyyət.
Keçən mövsüm bu cütlük 1/8 finalda da üz-üzə gəlmiş, ilk oyunda Liverpool 1:0 hesabı ilə qalib gəlmişdi. İndi isə tablo tam fərqlidir: PSG formadadır, Liverpool dalğalanır. Bu dəfə Parisdə hesabın açılması ilə oyunun qapanması arasında çox qol ola bilər.
İlk zərbə: PSG-dən sürətli başlanğıc gözlənilir
Luis Enrique-nin komandası Çempionlar Liqasında son beş matçın dördündə fasiləyədək qol vurub. Yəni PSG adətən matçı dikte etməyə oyunun əvvəlindən başlayır, rəqibi müdafiəyə sıxışdırır və erkən üstünlük axtarır.
Start “on birlik” bunu təsdiqləyir: Safonov qapıda, müdafiədə Hakimi, Zabarnyi, Pacho, Hernandez. Mərkəzdə Zaire-Emery, Beraldo, önlərində isə Doue və Lee. Cinahlarda Ousmane Dembele və Khvicha Kvaratskhelia, ön xətdə isə onların hər ikisinə meydan açan yaradıcı struktur.
Bu sistem Liverpool üçün ciddi başağrısı yarada bilər. Xüsusilə də cinahlarda Hakimi – Dembele və Kvaratskhelia ilə qurulan üçbucaqlar topa sahib olmağı sevən, amma arxa zonada boşluq buraxan komandalar üçün təhlükəlidir.
Liverpool-un cavabı: adlar var, ritm çatmır
Liverpool-un ehtimal olunan “on birliyi” də kağız üzərində güclüdür: qapıda Mamardashvili, müdafiədə Gomez, Konate, Van Dijk, Kerkez. Ortada Gravenberch və Jones, onlardan bir qədər irəlidə Wirtz. Hücum xəttində isə Szoboszlai, Salah və Ekitike.
Adlar səviyyə vəd edir, amma son həftələrdə bu üçlük sinxron hərəkət edə bilmir. Komanda yalnız bir səfər matçında iki və ya daha çox qol vurub, yaradıcılıq tez-tez epizodik qalıb. Salah hələ də fərq yarada biləcək oyunçudur, amma onun gələcəyi ilə bağlı qeyri-müəyyənlik fonunda Liverpool-un hücumu əvvəlki qədər sərbəst görünmür.
Buna baxmayaraq, Liverpool-un qol vurmaq potensialı danılmazdır. Ekitike sürəti ilə, Szoboszlai uzaqdan zərbələri ilə, Wirtz isə aralıq zonalarda aldığı toplarla Safonov üçün təhlükə yarada bilər. Amma bu, PSG-ni dayandırmağa kifayət edəcəkmi?
Fərq harada açılacaq?
PSG hazırda həm nəticə, həm də oyun keyfiyyəti baxımından zirvədədir. Dörd ardıcıl qələbənin hamısı iki və ya daha çox top fərqi ilə gəlib. Chelsea-yə qarşı iki oyunda ümumi hesab 8:2, arada Nice və Toulouse-a qarşı inamlı çıxışlar.
Son dörd Çempionlar Liqası matçında da ən azı iki qol. Üstəlik, turnirdə son 24 oyunun 20-də məğlub olmayıb. Bu, yalnız forma deyil, vərdişdir. Qələbə vərdişi.
Liverpool isə səfərdə ritm tapa bilmir. Komanda bəzən topa sahib olur, amma son zərbə çatmır. Qapı qarşısında tərəddüd, son ötürmədə dəqiqlik çatışmazlığı, məhz bu detallar PSG kimi rəqibə qarşı baha başa gələ bilər.
Belə fon qarşısında Paris klubunun bu ilk oyunda iki top fərqi ilə üstünlük qazanması real ssenaridir. Evdəki təzyiq, hazır forma, sürətli başlanğıc, hücumda müxtəliflik – hamısı bir istiqaməti göstərir.
Skorun rəngi
Bu matç üçün proqnoz aydındır: PSG-nin üstünlüyü və qollu oyun.
Parisdə 3:1 hesabı real görünür. Ousmane Dembele, Desire Doue və Khvicha Kvaratskhelia kimi oyunçuların qol ehtimalı yüksəkdir. Liverpool tərəfdə isə Hugo Ekitike-nin sürəti və cərimə meydançasına daxilolmaları qonaqlar üçün yeganə təsəlli qolu gətirə bilər.
PSG ilk oyunda Anfield-ə rahat nəfəs ala biləcəyi hesabla yollanmaq istəyir. Liverpool isə bu dalğanı döndərə biləcəkmi, yoxsa Parisdə alınan zərbə mövsümün Avropa səhnəsində son akkordu olacaq? Cavab bu gecə Parc des Princes-in gurultusunda gizlənib.
